Homeबातमी शेतीचीआता शेतकरी स्वतःच करू शकणार मोबाईल ॲपद्वारे आपल्या पिकांची नोंदणी

आता शेतकरी स्वतःच करू शकणार मोबाईल ॲपद्वारे आपल्या पिकांची नोंदणी

किसानवाणी : शेतजमिनीच्या उताऱ्यांवर पिकांची नोंद केली जाते. या नोंदीमुळे शेतकऱ्यांचे उत्पादन, शेत जमिनीची प्रतवारी, दुष्काळ, अतिवृष्टी किंवा वादळामुळे झालेल्या नुकसानीचा अंदाज लावणे शक्य होते. या पीक नोंदणीच्या आधारे शेतकऱ्यांना पीक कर्जही दिले जाते. मात्र दोन तीन गावांमध्ये मिळून एकच तलाठी असल्याने पीक पाहणी अचूक नोंदवली जात नाही असा शेतकऱ्यांचा कायम आक्षेप होता. यावर मार्ग काढण्यासाठी आता महसूल विभागाने आपल्या पिकांची रिअल टाईम नोंदणी करण्याची सुविधा थेट शेतकऱ्यांच्यासाठी उपलब्ध करून दिली आहे. महसूल विभागाने यासाठी स्वतंत्र अप्लिकेशनची निर्मिती केली असल्याची माहिती महसूलमंत्री बाळासाहेब थोरात यांनी दिली आहे.

टाटा ट्रस्टच्या सहाय्याने या मोबाईल ॲप्लिकेशनची निर्मिती करण्यात आली असून यामध्ये शेतकरी पिकांची माहिती भरतील आणि तलाठी या पिकांच्या नोंदी तपासून घेतील. यामुळे पीक पेरणीची रियल टाइम माहिती अप्लिकेशनमध्ये संकलित होणार आहे. तसेच ही माहिती संकलित होताना पारदर्शकता येणार आहे. पीक पाहणी नोंदणीमध्ये शेतकऱ्यांचा सहभाग वाढवल्यामुळे पीक विमा आणि पीक पाहणीचे दावे निकाली काढण्याची प्रक्रिया सुलभ होईल. शेतकऱ्यांना पीककर्ज मिळण्यातही यामुळे सुलभता येईल. तसेच नैसर्गिक आपत्तीमुळे पिकांचे नुकसान झाल्यास अचूक भरपाई आणि मदत देणे ही शक्य होईल, असेही थोरात यांनी सांगितले.

ई पीक पाहणी मुळे राज्यातील पिकांचे अचूक क्षेत्र कळणार आहे, त्यामुळे राज्यातील आर्थिक पाहणी आणि कृषी नियोजन करणे शक्य होणार आहे. ई पीक नोंदणी प्रकल्प यापूर्वी प्रायोगिक तत्वावर वीस तालुक्यात राबवण्यात आला होता. त्याला मिळालेल्या यशानंतर हा राज्यभर राबविण्याचा निर्णय महसूलमंत्री बाळासाहेब थोरात यांनी घेतला. आज त्यासंदर्भाने राज्य सरकारने शासन आदेश जारी केला आहे.

ई पीक पाहणी प्रकल्पाच्या यशस्वी अंमलबजावणी साठी राज्य स्तरीय, विभागीय, जिल्हा स्तरीय आणि तालुका स्तरीय सनियंत्रण समित्या गठित करण्यात आल्या आहेत. याशिवाय पूर्ण वेळ प्रकल्प अंमलबजावणी कक्ष संचालक भूमी अभिलेख, पुणे यांच्या नियंत्रणाखाली सुरू करण्यात आला आहे. (बातमीतील कोणत्याही ठिकाणच्या हिरव्या रंगाच्या अक्षरांवर क्लिक करून तुम्हाला हे अॅप डाऊनलोड करता येईल, १५ ऑगस्ट पासून हे अॅप राज्यातील सर्व शेतकऱ्यांसाठी वापरता येईल)

RELATED ARTICLES
- Advertisment -

Most Popular

Recent Comments